skip to content

اشراقة ساخرة

كتبتها / هبة مصطفى
اطلق لخيالك العنان .. واسرح معى بخيالك وتخيل حال بلادنا عام 2025 ,

اعتقد فى ظل التشويهات الرائعة لدستورنا الجليل وأثارها الممتدة سيكون حاكمنا ورئيسنا هو مبارك الثالث عشر ( طويل العمر .. يطول عمره ) وحينها سيطالب باجراء تعديلات دستورية خاصة للمادة 6666666666666 التى تنص على :

" يجوز للحاكم ضمان فترة رئاسة لحفيد حفيدة لست فترات متتالية مدة الفترة قرن من الزمان "

وسيطالب بتعديلها الى :
" يجوز للحاكم ضمان فترة رئاسة لحفيده الثانى والعشرون والحكم مدى الحياة لمدة لا يقطعها الا القدر "
حينها يظل الشعب ( اذا كان موجود اجيال بعد كده ) على صمته الحالى وقليل ما قالوا ( كمان يا ريس )
وساعتها هتكون حياتنا :
رغيف العيش : عبارة عن دائرة قطرها 2و مليمتر لونها اسود وثمنه 100 جنيه , وسائل المواصلات : مقطورة او شاحنة كبيرة تقل ما يقرب من 6000 مواطن وهى عبارة عن خط واحد يصل الاسكندرية بأسوان ويمر بباقى المحافظات ( يعنى لو عايز تروح الشغل النهاردة تلحق تركب من الاسبوع اللى فات ) وتحوش 135 جنيه ثمن التوصيلة , المنازل عشش فى الصحراء ( تعمير للصحراء واستصلاح للاراضى ) لكل 100 مواطن عشة واحدة متر * متر , الحالة الصحية : انفلونزا الطيور والبشر , جنون البقر , السل , ........ امراض كتير متفشية فى البلد والدكاترة شغالين على ودنه .

ايه التشائم ده , ايه النظارة ديه , يلا بصوا يا شباب للدنيا بنظرة جديدة ومتفائلة . طيب اعمل ايه ما هو الناس هما اللى سكتوا من سنة 2007 وسابوا الريس يغير فى قوانينا والمواد بتاعته زى ما هو عايز , مستنين الحال يبقى ازاى ؟!

انا لو ربنا ادانى العمر لحد سنة 2025 , وفضلت بعقلى اول حاجة هستناها ثورة جديدة تخلع النظام وتطرد الحاكم واسرته بره البلد بس ساعتها اللى هيعملها هو الشعب كله علشان محدش يتخانق مع حد وهم بيوزعزا التركة مش ناقصين مشاكل .

أصل قدر الشعب ده انه يعيش من كل 100 سنة يجيى عشرتاشر يوم كويسين وحلوين , ده مش كلامى ده كلام التاريخ من ايام محمد على , والقرن اللى فات ثورة الضباط الاحرار , وادينا مستنين القرن ده هيحصلنا ايه تانى ( اصل اللى حصل فى اوله مش كفاية )

ربنا يســـــــــــــــــــــــــــــــتر